കൊടുങ്ങല്ലൂരിൽ 14കാരിയെ പീഡിപ്പിച്ച കേസില്‍ ഗ്രേഡ് എസ്.ഐ അറസ്റ്റില്‍. ഇരിങ്ങാലക്കുടയിലെ റൂറല്‍ എസ്.പി ഓഫിസില്‍ ജോലിചെയ്യുന്ന ഗ്രേഡ് എസ്.ഐ യും മാള കൊമ്പത്തുപടി സ്വദേശിയുമായ 50 വയസുള്ള ചന്ദ്രശേഖരനെയാണ് കൊടുങ്ങല്ലൂർ പൊലീസ് അറസ്റ്റുചെയ്തത്.
കൊടുങ്ങല്ലൂരിലെത്തിച്ചാണ് പീഡിപ്പിച്ചതെന്ന് കുട്ടിയുടെ മൊഴി.
മറ്റൊരു സംഭവവുമായി ബന്ധപ്പെട്ട് കുട്ടി കൗണ്‍സലിങ്ങിന് വിധേയയായപ്പോഴാണ് എസ്.ഐ പീഡിപ്പിച്ച വിവരം പെൺകുട്ടി വെളിപ്പെടുത്തിയത്. തുടർന്ന് കൗണ്‍സിലർ ഇരിങ്ങാലക്കുട വനിത സെല്ലില്‍ വിവരമറിയിക്കുകയായിരുന്നു. വനിത എ.എസ്.ഐയുടെ നേതൃത്വത്തില്‍ മൊഴിയെടുത്ത് കേസ് രജിസ്റ്റർ ചെയ്തതിന് ശേഷം സംഭവം നടന്ന സ്ഥലത്തെ സ്റ്റേഷനായ കൊടുങ്ങല്ലൂർ പൊലീസ് സ്റ്റേഷനിലേക്ക് കൈമാറുകയായിരുന്നു. കൊടുങ്ങല്ലൂർ ഇൻസ്പെക്ടറുടെ നേതൃത്വത്തില്‍ വ്യാഴാഴ്ച രാവിലെയാണ് പ്രതിയെ അറസ്റ്റ് ചെയ്തത്. പ്രതി നേരത്തേ കൊടുങ്ങല്ലൂർ സ്‌റ്റേഷനിലും ജോലിചെയ്ത ആളാണ്.